Seileach
Tha an seileach ri faighinn air feadh na dùthcha, gu h-àraidh ann an àiteachan bog. Chan fhàs i mòran nas àirde na còig meatairean deug. Nuair a tha a' chraobh òg tha an rùsg rèidh, donn-orains ach mar a bhios i a' fàs nas sine bidh e a' fàs liath. Tha fiodh an t-seilich aotrom is tolltach agus gleidhidh e tòrr uisge.

Mar a' bheithe, b' e an seileach aon den chiad chraobhan a nochd an dèidh Linn na Deighe.

A thuilleadh air an fheum a bhatar a' dèanamh dhith airson bhascaidean, ròpa, togail thaighean is fheansaichean, clèibh ghiomach agus uidheaman eile, bha i cuideachd air a meas na craoibh dhraoidheil.

Mar a' bheithe cuideachd, bha i co-cheangailte ri Naomh Brìghde. Gu h-annasach, thathas dhen bheachd gu bheil na trì stuic criogaid gum bithear a' bualadh a' bhuill chun là an-diugh nan samhla air trì pearsachan Brìghde! B' e am fiodh seo a bha a' dol ann am bataichean criogaid. Mus tàinig plastaig b' iomadh rud a bhatar a' dèanamh à seileach.

Bha fiodh seilich èifeachdach airson dìon bhon droch-shùil ach bha geug no dhà dheth am broinn an taighe a' toirt soirbheachadh don taigh. 'S ann bho stuth a th' ann an rùsg an t-seilich a tha aspirin ga dhèanamh. Bha sùgh an t-seilich math airson lotan is foinneachan cuideachd. Roimhe seo bha teatha ga dhèanamh dhen rùsg is bha seo air a ghabhail nam biodh droch fhuachd aig duine no nam biodh siatag air.

Bha rùsg seilich ga thoirt dha beathaichean mar fhodar, airson cart a chur ann an leathair agus airson dath brèagha buidhe-ruadh fhaighinn.

Lorg arc-eòlaichean bascaid de sheileach ann an Sealtainn a bhathas a' meas a chaidh a dhèanamh anns an 6mh linn agus bha an dòigh dèanaimh aice dìreach ann an stoidhle an là an-diugh. Chithear a' bhascaid seo ann am Museum Rìoghail na h-Alba ann an Dùn Èideann.

Tha Crìosdaidhean a' samhlachadh seileach ri bròn air sgàth 's mar a tha e air ainmeachadh ann an salm 137. Ann am Beurla canar weeping willow ri aon seòrsa dhiubh agus chithear iad air a snaidheadh air lic-uaigheach.

An-diugh tha obair-seilich a' fàs a-rithist agus e air a chleachdadh ann an àirneis ghàraidhean is hutaichean-cluiche cloinne is a leithid sin.

Tha seileach a' nochdadh ann an ainmean-àite leithid Ach nan Seileach agus Corrieshalloch airson gun robh na craobhan a' fàs ann agus airson nan obraichean co-cheangailte ri seileach a bha a' dol san àite.