Sgoil nan Loch

'S e sgoil ùr 5-14 a chaidh a dhealbhachadh agus a thogail le Comhairle nan Eilean Siar a th' ann an Sgoil nan Loch. Tha an sgoil air cuspairean a thaghadh a tha a' sealltainn mar a tha an sgoil gach cuid air cur an seilbh, agus air tarraing air a' bheartas shaidhbhreach ann am beatha dhlùth nan coimhearsnachdan ann an Eileanan Alba. Dh'fhoghlam iad, le bhith a' tighinn gu chèile nan aonan bho cheithir sgoiltean a chaidh a dhùnadh, ma bhathas a' dol a ghleidheadh spiorad agus caractar nan sgoiltean sin, gu feumadh a h-uile atharrachadh a bhith air a làimhseachadh air dhòigh 's gum biodh: leantanas acasan a chaidh a ghluasad; fàilte ro dhaoine ùra; agus beannachd mhath a bhith air a leigeil leothasan a bhiodh a' fàgail - le dànadas a bhiodh air àrach leis an sgoil.

Ro-ràdh

Chaidh Sgoil nan Loch fhosgladh san Lùnastal 2001. Tha an sgoil ann an Eilean Leòdhais, a tha nas fhaide a-muigh na an t-Eilean Sgitheanach, air taobh siar Alba. Tha an sgoil airson muinntir nan Loch. Chaidh trì bun-sgoiltean agus aon sgoil 5-14 a dhùnadh, agus bha iad sin gu lèir air a bhith suidhichte sna coimhearsnachdan beaga aca fhèin. Bha pian agus spàirn an lùib a bhith a' gluasad, eadhon ged a bhathas a' dol a-steach do sgoil talc ùr. Tha an togalach sgoile ùr a' togail air eachdraidh agus air neart a bha sna sgoiltean a dhùin, seach gur ann astasan a thàinig mòran dhe na sgoilearan agus an luchd-teagaisg. Gu eachdraidheil, 's e coimhearsnachd dhlùth-dhàimheil a th' air a bhith ann an Leòdhas, agus tha aithne no eòlas air choreigin aig a' chuid mhòr dhen t-sluagh air a chèile. Tha eòlas fìor mhath aig a' chuid mhòr dhen chloinn air a chèile. Tha a' chuid mhòr dhe na teaghlaichean an dàrna cuid faisg no fad' às an càirdeas dha chèile, agus tha am beatha air a bhith fillte ri chèile agus air beantainn ri chèile am broinn nan càirdeasan sin thar nan ginealaichean. Tha seo ga dhèanamh gu math nas fhurasta a bhith a' togail coimhearsnachd thaiceil san sgoil, ach a dh'aindeoin sin tha obair na lùib.

Tha 94 sgoilearan againn bho P1 gu S2. Tha àireamh an luchd-teagaisg mar a leanas: Stiùiriche Sgoile, Iar-Stiùiriche Sgoile, 3 luchd-teagaisg Bun-sgoile làn-thìde agus 1 neach-teagaisg Àrd-sgoile làn-thìde, 14 luchd-teagaisg pàirt-ùine agus siùbhlach, 1 neach-cuideachaidh clasrum agus 5 luchd-taice làn-thìde, agus 3 dhen àireamh sin ag obair còmhla ri na sgoilearan aig a bheil duilgheadasan ionnsachaidh doirbh agus iom fhillte. Tha luchd-obrach taice againn, a tha èiseil airson maith nan uile, agus 's iadsan rùnaire, dorsair, 3 luchd-obrach san ionad-bidhe agus 4 luchd-glanaidh. A bharrachd air sin, tha 3 luchd-obrach agus 21 a bharrachd chloinne ann an 'leudachadh' sa choimhearsnachd sgoile againn agus thèid an ainmeachadh-san nas fhaide air adhart.

A' socrachadh atharraichidhean agus a' meudachadh toirt a-steach

Tha e follaiseach gu bheil mòran neart ann an coimhearsnachd bheag dhlùth-dhàimheil, ach an dèidh sin tha atharrachadh fhathast a' toirt an fhois na lùib. 'S e pàirt èiseil dhe bhith a' cruthachadh gnè mhath gun toir e comas dhan a h-uile neach buaidh a thoirt air atharraichidhean agus dùbhlain. Tha sinne air feuchainn ris an seo a dhèanamh ann an iomadh dòigh, 's chan ann air a' char as lugha le bhith a' dèanamh atharraichidhean nas fhurasta an giùlan agus a bhith a' meudachadh toirt a-steach.

Ag ullachadh, a' gluasad, a' com-pàirteachadh …

San teirm mu dheireadh de sheisean sgoile 2000-2001 b' fheudar dhuinn grunnan cho-dhùnaidhean a dhèanamh airson gum biodh eileamaidean nan àite airson toiseach an t-seisein ùir san togalach ùr againn. Bha co dheasbadan a' gabhail àite air a' fòn 's aig coinneamhan aig àm na sgoile agus às dèidh na sgoile. Thug Bòrd na Sgoile eadar-àmail, a chaidh a chur air chois airson sùil a chumail air na h-atharraichidhean an co-bhonn ris an luchd-obrach, ionnsaigh air ainm ùr a lorg dhan sgoil ùir. Thàinig iad cuideachd gu co-dhùnadh air dathan sgoile, suaicheantas a dhealbh, agus am biodh no nach biodh an sgoil a' cur air adhart gum bu chòir làn-èideadh sgoile bhith aca. Chaidh sgrùdadh a dhèanamh am measg nam pàrant air a' phuing dheireannaich seo. Bha iad cha mhòr uile dhen làn-bheachd gum bu chòir do làn-èideadh sgoile bhith ann. Chaidh iarraidh air na sgoilearan a dhol a-steach airson nam farpaisean a bh' ann a dh'aon ghnothaich airson dathan, ainm sgoile agus suaicheantas fhaighinn, agus thabhaich fear-gnìomhachais sa choimhearsnachd duaisean a thoirt. Mun àm seo bha sinn a' faireachdainn gun robh a h-uile neach a bha a' dol a ghluasad dhan sgoil ùir gu h-èasgaidh an lùib a bhith a' seatadh an-àirde agus a' sireadh comhairle air na bha ri dhèanamh.

B' e a' chiad dùbhlan a bhith a' gluasad bho na sgoiltean a chaidh a dhùnadh gu sgoil ùir le cho beag ùpraid 's a ghabhadh. Bha aig an luchd-teagaisg ri clasruman ùra agus gnàth-chùrsaichean ùra a stèidheachadh le cho beag 's a ghabhadh de bhristeadh air foghlam na cloinne. Chuir iad seachad mòran uairean a thìde de shaor-làithean an t samhraidh aig an sgoil ùir, ag obrachadh a-mach ciamar a thigeadh rudan gu chèile.

Dh'aithnich sinn mar bu mhotha bha sinn a' dol air adhart gur e fìor thogail-inntinn a bha san togalach fhèin - a' dèanamh ar n-obair na b' fhasa. Mar a b' fhaisge bha an teirm ùr a' tighinn, b' ann bu mhotha a bha ar cinn nam breislich eadar boil agus feagal. Thàinig a' mhòr-chuid dhen luchd-obrach bho na sgoiltean a dhùin, ach bha luchd obrach ùr-nodha a' dol a thighinn cuideachd agus dh'fheumaist fàilte a chur orrasan. 'S math a b' fhiach an samhradh sin seach gun robh an luchd-obrach ag obair còmhladh le aon amas. Seach gun robh sinn gu lèir a' gabhail pàirt san aon dùbhlan thog sin 'ceangal' eatarainn, chan ann a-mhàin aig an àm èiseil sin ach na b' fhaide air adhart cuideachd.

A' socrachadh atharraichidhean nan sgoilearan

Tha an sgoil suidhichte air an rathad mhòr eadar Na Hearadh agus Steòrnabhagh. Air sgàth sin, tha sgoilearan à sgoiltean eile air roghnachadh a thighinn do Sgoil nan Loch tro iarrtasan àite, agus tha iad air saidhbhreas a thoirt do gach ìre dhen sgoil againn. Tha sgoilearan às na bun-sgoiltean ceangail air am fiathachadh dhan sgoil againn gus am faigh iad blasad dhen Àrd-sgoil nuair a tha iad air P7. Bidh iadsan, agus clann nas òige san sgoil aca cuideachd, a' tighinn gu Sgoil nan Loch ma bhios sinn a' cur air adhart bùthan-obrach air dràma no ceòl le ionadan bho muigh.

Tha e air leth cudromach gum bi neach-teagaisg air a chur air leth airson cùram a shealltainn, agus fiosrachadh a thoirt, do sgoilearan ùra S1 agus S2. Airson seo a dhèanamh tha sinn air seiseanan-oideachaidh a stèidheachadh do sgoilearan san àrd-sgoil. Tha an rèiteachadh seo a' toirt cothrom do sgoilearan fa-leth bruidhinn ri oide mu an adhartas, agus mu rud sam bith eile a tha cudromach dhaibh. Le bhith dèanamh seo, thug e oirnn a bhith a' faicinn gun robh feum aig sgoilearan a tha a' tighinn às ùr dhan sgoil fhad 's a tha iad fhathast sa bhun-sgoil, air coinneachadh ro-làimh ri ar luchd-teagaisg bun-sgoile. Bha e furasta smaoineachadh gun gabhadh seo àite co-dhiù, ach gu dearbh cha b' ann mar sin a bha - bha e a' cur feum air oidhirpean com-pàirteachais gach neach.

Bidh ar clasaichean bun-sgoile a' gabhail pàirt ann an 'Ùine Cearcaill' agus tha luchd-obrach na sgoile air seo fhaighinn prìseil. Bidh ar sgoilearan àrd-sgoile a' gabhail pàirt ann an seiseanan 'co-aghaidh' a tha, mar Ùine Cearcaill, a' toirt cothrom dhaibh bruidhinn air càil sam bith a tha cudromach dhaibh. Bidh an sgoil againn a' cleachdadh postairean nan Riaghailtean Òir agus a' misneachadh chloinne gu bhith a' beachdachadh air na tagraidhean a th' annta. Tha na postairean an-àirde timcheall na sgoile mar chuimhneachain air mar a lùigeadh sinn sgoilearan a bhith gan giùlan fhèin agus a bhith a' dèiligeadh ri càch a chèile, 's a' gabhail a-steach nan sgoilearan sin a tha ùr dhan choimhearsnachd. Thathas a' cur a h-uile sgoilear ann an 'taigh' nuair a thig iad dhan sgoil airson gun cuidich sin iad gus eòlas fhaighinn air buidhnean nas lugha de sgoilearan agus gum bi e nas fhasa dhaibh pàirt a ghabhail.

'S e ainmean bheanntan sa choimhearsnachd a thagh na sgoilearan fhèin airson ainmean thaighean - Mòbhal, Scalabhal, agus Beinn Mhòr. Tha e mar dhleastanas air caipteanan-taighe agus iar-chaipteanan taighe còmhla ri buill dhen Chomhairle Sgoile, a bhith ag obrachadh còmhladh airson math na coimhearsnachd 's na sgoile.

Nuair a tha sgoilearan S2 an ìmpis ar fàgail airson gluasad gu S3 ann an Steòrnabhagh tha luchd-obrach na sgoile air fasan a thòiseachadh a bhith a' fiathachadh na h-òigridh gu dìnneir airson gun tèid an ceum tha iad a' gabhail bho Sgoil nan Loch a chomharrachadh. Bidh an luchd-teagaisg a' riaghladh biadh trì-chùrsaichean dhan chloinn le uidheam airgid agus às dèidh teatha/cofaidh bidh cèilidh againn. 'S e feasgar fìor mhath a th' ann agus tha iadsan a tha a' toirt ceum gach bliadhna a' feitheamh ris le dùrachd.

Ged a tha na h-atharraichidhean mòra agus beaga am broinn na sgoile cudromach, feumaidh ar sgoilearan cuideachd a bhith ullaichte airson atharraichidhean nas motha nas fhaide air adhart nam beatha, mar a bhith a' fàgail na dachaigh, agus do chuid, a bhith fàgail Leòdhais. Fhad 's a tha iad ann an Sgoil nan Loch bidh sinne aig dà àm a' toirt blasad do na sgoilearan air cò ris a tha e coltach a bhith a' fuireach air falbh bhon taigh.

Bidh ar bun-chlas as sine a' dol air seachdain a dh'Ionad Scaladail sna Hearadh, far am faod iad coiseachd, sreap, aibseileadh, agus currachan a chleachdadh, am measg rudan eile. Bidh sinn a' toirt na feadhainn as sine san Àrd-sgoil a Dhùn Èideann fad seachdain far am faod iad mòran a dhèanamh, m.e., tadhal air Stadium Rugbaidh Mhurrayfield, Caisteal Dhùn Èideann, taighean-tasgaidh eadar-dhealaichte, agus an taigh-dhealbh, a dhol a bhobhladh no am bus no an trèana a ghabhal a Ghlaschu. Tha sinn a' faireachdainn gu bheil a bhith air falbh mar sin a toirt cothrom dhar sgoilearan agus dhar luchd-teagaisg eòlas fhaighinn air a chèile aig ìre nas doimhne.

A' meudachadh com-pàirteachadh ann an coimhearsnachd na sgoile

Rè na bliadhna mus do ghluais sinn gu Sgoil nan Loch bha a' choimhearsanchd a' seatadh an-àirde cròileagan san ionad coimhearsnachd aca fhèin. Ach, bha àite a dh'aon ghnothaich san togalach againne bho thoiseach, nam b' e 's gum biodh cròileagan ann. Nuair a dh'fhosgail an sgoil bha sinn toilichte fàilte a chur air a' chròileagan 'Lochies Bheaga' san robh 15 pàiste agus 2 neach-obrach. Tha a' bhuidheann seo an-diugh na pàirt coileanta dhen sgoil againn agus tha co-obrachadh eadar ceannardan a' chròileagain agus neach teagaisg nan ìrean tràtha air fàs gu daingeann gu buannachd nan uile.

Bha dà àite eile san sgoil againn fhathast gun an roinn agus gun a bhith air an leasachadh airson adhbharan sònraichte. Cha robh sinn fosgailte ach beagan mhìosan nuair a dh'iarr an t-seirbheis fo-sgoil ann an roinn an fhoghlaim oirnn àite a thoirt do bhuidheann beag a bha ag obair le sianar chloinne air an robh èisean mothachaidh. Dh'aontaich sinn uile gum biodh seo na bhuannachd dhan chloinn sa bhuidhinn agus do chloinn na sgoile cuideachd. Dà bhliadhna air adhart tha iad nam pàirt cudromach agus air leth sònraichte dhen sgoil againn, agus cuid dhen chloinn sin a' fuireach san sgoil againn nuair a ruigeas iad aois sgoile, agus cuid eile a' falbh dhan sgoil sa choimhearsnachd aca fhèin. Am bliadhna tha cothrom air a bhith againn clas a thòiseachadh sa bheil triùir chloinne aig aois sgoile aig a bheil feumalachdan-ionnsachaidh a tha toinnte agus doirbh. Seach gu bheil na buidhnean sin ann, tha iad air leudachadh a thoirt air coimhearsnachd na sgoile againn, agus air an cothrom a thoirt dhan luchd-teagaisg agus dha sgoilearan gu lèir a bhith a' coimhead an t-saoghail ann an dòigh nas fharsainge, agus a bhith ag aithneachadh gu bheil luach ann an coimhearsnachd ioma-dhathach. Tha com-pàirteachadh air a' thighinn air adhart gu cinnteach, le tuigse ga thoirt do gach sgoilear.

Na dìochuimhnichibh an luchd-teagaisg!

Tha broinn gach stafrum na thoradh orrasan a bhios ga chleachdadh agus 's e stafrum toilichte a th' againne. Bidh sinn a' feuchainn ri chumail sgiobalta agus saor o obair-pàipeir! (Nam biodh a h-uile inbheach aig a bheil pàirt air choreigin ann a bhith a' toirt taic dhar sgoilearan an seo aig an aon àm bhiodh 54 againn ann).

"Cala sìtheil ach daonnan togail-inntinn, àite airson fois agus gàire."
(Neach-teagaisg)

Tha saorsainn aig luchd-teagaisg a bhith bruidhinn air cuspairean, a bhith a' toirt am beachd seachad, a bhith ag aontachadh agus gun a bhith ag aontachadh gu proifeiseanta; tha seo gu lèir gu buannachd ar sgoilearan. Mar na sgoilearan, tha eòlas math aig an luchd-teagaisg air a chèile, bidh iad a' bruidhinn ri chèile mu leanabain, mu dheugairean, mu chàirdean aosta … agus tha dragh mòr orra mu chèile agus airson na coimhearsnachd sa bheil iad a' còmhnaidh agus ag obair. Tha a h uile neach-obrach, ge b' e dè an seòrsa obrach a th' aca, a' cur ann an dòigh eadar-dhealaichte ri obair fharsaing na sgoile. Tha ar n-obair le pàrantan stèidhichte air tuigse mhothachail mun phàirt a th' aig gach buidheann ann a bhith a' toirt an cuid chloinne air adhart.

A bhith nar pàirt iomlan dhen choimhearsnachd

Tha sinn fortanach a bhith nar pàirt de choimhearsnachd dhiongmhalt agus tha sinn a' miannachadh pàirt làn is pàirt taiceil a ghabhail innte, a' tabhairt cho math ri bhith a' faighinn..

A' cur luach air oighreachd a' chànain

Tha a' Ghàidhlig na pàirt co-cheangailte agus cudromach am beatha Sgoil nan Loch. Tha a' Ghàidhlig aig a' chuid mhòr dhen luchd-obrach, tha feadhainn aig nach eil ach beagan agus tha cuid eile a' feuchainn ri h-ionnsachadh. Tha stiùiriche na sgoile am measg na feadhnach sin! Tha a' Ghàidhlig air a teagaisg bho ìre P1 gu ìre S2. Tha grunnan dhen chloinn bho dhachaighean far a bheil a' Ghàidhlig ga bruidhinn agus tha fiosrachadh aig a' mhòr-chuid dhen chloinn a bheir dhaibh comas labhairt de sheòrsa air choreigin innte. Bidh sgoilearan S1 agus S2 a' faighinn leasanan innte tron t-seachdain. Tha luchd-teagaisg Gàidhlig eadar-dhealaichte aig luchd-ionnsachaidh is fileantaich agus bidh iadsan aig a bheil a' Ghàidhlig san dachaigh a' measgachadh ri na fileantaich airson clasaichean conaltraidh agus còmhraidh. Chan eil, aig a' cheart àm, clas tro mheadhan na Gàidhlig san sgoil, ged a dh'fhaodadh seo a thighinn uaireigin, agus cha bhi sinn a' teagaisg tro mheadhan na Gàidhlig. Bidh an sgoil a' cur a-steach farpaisich chun a' Mhòid Ionadail agus tha an còisir againn air a bhith soirbheachail aig a' Mhòd Nàiseanta.

Bòrd na sgoile, Comann phàrant-thidsear agus Comhairle Choimhearsnachd

Airson na bliadhna mus do dh'fhosgail an sgoil ùr bha Bòrd-Sgoile Eadar-ama ann. Chaidh a stèidheachadh bho bhuill de dhà dhe na Bùird-Sgoile eile. Dh'obraich am Bòrd glè chruaidh, agus thàinig na buill gu co-dhùnaidhean cudromach a bha èiseil do thoiseach an t-seisein 2001-02. Bha e glè fheumail dhan sgoil ùir gun robh am Bòrd cho èasgaidh. Chaidh Bòrd-Sgoile Sgoil nan Loch a stèidheachadh ann an 2001 agus tha na buill air dian-obrachadh airson coimhearsnachd na sgoile. Tha na ceangail a th' aca ri pàrantan na cloinne, cho math ri na ceangail a th' aca ris a' choimhearsnachd, air ciallachadh gum b' urrainn dhuinne a bhith ann an dlùth dhàimh ri ar coimhearsnachd. B' e Bòrd na Sgoile cuideachd a chluich am prìomh phàirt ann a bhith a' cur Latha Gala air chois sa Chèitean a chaidh. Chuir an Latha ri maoin na sgoile.

Chaidh oidhirp thràth a dhèanamh PTA a thòiseachadh, ach bha e cus dhuinn. Nuair a chaidh oidhirpeachadh an dèidh làimhe dh'obraich e, agus tha PTA soirbheachail againn a-nis, agus 's iad na buill a chuir air chois fear dhe na tachartasan as ùire tha a' gabhail àite san sgoil - 's e sin Suipear Burns san sgoil far an tàinig còrr is 230 neach. 'S e màthair-adhbhair na cùise fios a thoirt do sgoilearan, pàrantan agus caraidean na sgoile a bhith làthair aig tachartas sòisealta coimhearsnachd. Tha sinn air cluinntinn gun do chòrd am feasgar ri na bh' ann!

Tha sinn miannach dha-rìribh air ceangal ris a' chomhairle choimhearsnachd a dhaingneachadh. Aig a' cheart àm tha sinn a' co obrachadh leotha air proiseact a bheir, tha sinn an dòchas, a' choimhearsnachd a bhroinn na sgoile againn (faic a-rithist san earrainn air Àrainneachd).

Feasgar iom-ionaid agus ceangal ri gnothaichean ionadail

Sa Ghearran 2003 chuir an sgoil feasgar iom-ionadail air adhart. Thug seo cothrom do dh'ionadan eadar-dhealaichte (Parentwise, Proiseact nan Sgoiltean Ùra Coimhearsnachd, Raon-dèilig Meidigeach, Poilis a' Chinn a Tuath, Bòrd na Sgoile/PTA, Roinn an Fhoghlaim, Foghlam Coimhearsnachd agus buidheann ionadail a tha a' toirt comhairle do mhaoineachadh Foghlam Àrd-ìre/Àrdachadh) ceangail a thogail ri sgoilearan, pàrantan agus coimhearsnachd agus cuideachadh agus comhairle a thabhann. Bha sinn ag iarraidh gun deigheadh an sgoil a chleachdadh mar mheadhan-saoghail airson fiosrachadh, àite far am faighist agus san toirist seachad fiosrachadh. Chaidh gabhail ris an fheasgar glè mhath agus tha dùil againn a leithid a chumail dà uair sa bhliadhna.

Tha sinn air a bhith glè fhortanach gu bheil gnìomhachasan ionadail air ùidh a shealltainn agus air taic a thabhairt. Tha grunnan chompanaidhean ionadail air a dhol an urras diofar rudan a tha gu math na sgoile, m.e. ar leabhraichean-latha sgoile agus Bogsa Ghoireasan Urras Rìoghail na Gaidhealtachd.

A' cleachdadh agus a' gabhail cùram airson na h-àrainneachd agus ar soirbheas fhèin

Tha sinn glè mhothachail air ar n-àrainneachd seach gu bheil sinn a' fuireach ann an àite a tha rudeigin iomallach agus bòidheach - tha buaidh mhòr aig a seo air beatha na sgoile.

Adhartasan àrainneachd agus eag-eòlas

Nuair a dh'fhosgladh an sgoil againn bha an talamh mun cuairt lom, ach làn cothruim. A-nis, faisg air an sgoil, tha stòras lusan-cura againn agus raon ball-coise (faic Dealbh G).

"Tha an raon ball-coise math. Is toigh leam a bhith a' cur tadhal".
(Sgoilear P3)

Bha cuideachd pìos mòr talmhainn againn na b' fhaide air falbh on sgoil, glè dheiseil airson piseach a thoirt air. 'S e fear dhe na ciad smaointean a bh' againn craobhan a chur. Chuir sinn craobh do gach ball fa-leth dher coimhearsnachd sgoile agus an ainm ris. Smaoinich sinn cuideachd gum biodh e snog na craobhan a chur air prògram CAD gus am b' urrainn do chloinn sna ginealaich tha romhainn aithneachadh càit an do chur am pàrantan no an sean-phàrantan craobh! Bhon uair sin tha seo air fàs na phàirt mòr dhe ar prògram leasachaidh raon-cluiche, anns a bheil àite aig Rainsear Urras Steòrnabhaigh, agus bidh sinn an dòchas, Coimisean na Coilltearachd.

Chaidh comhairle iarraidh air an Rainsear cuideachd airson bogsa eun a sheatadh an-àirde. Chuir sinn tagradh gu SNH agus fhuair sinn tabhartas. A-nis, tha bogsa-neadachaidh againn, sa bheil camara bhidio beag, suidhichte an làrach na sgoile. Tha seo a' cur dhealbhan a-steach gu telebhisean a-staigh an an àite sòisealta na sgoile agus bidh sin an dòchas gu faod na sgoilearan a bhith a' coimhead nan eun a' neadachadh am bliadhna.

Bheir na ceangail a tha againn ri Proiseact nan Sgoiltean Coimhearsnachd agus ris a' Chomhairle Choimhearsnachd dhuinn cothrom ar miannan airson na h-àrainneachd agus na coimhearsnachd a thoirt ceum air adhart le bhith a' cur romhainn gun ceannaich sinn poilidh-tunail airson planntaichean fhàs. Obraichidh ar Club Gàrraidheachd fhèin, 'Greenfingers' còmhla ri deònaichean às a' choimhearsnachd airson gun toir iad air adhart an eòlas agus an tuigse air planntaichean, craobhan agus glasraich.

Tha loch beag glè fhaisg dhuinn: aig a' cheart àm faodaidh ar sgoilearan àrd-sgoil a bhith a' cleachdadh currach air an loch nuair a tha P.E. aca. Tha sinn an dòchas gnothaich a dhèanamh ris a' chomhairle choimhearsnachd ach an gabh adhartas a dhèanamh còmhla riutha gus am bi àite againn a dh'aon ghnothaich a-muigh, airson ar n-aodach atharrachaidh, agus àite far am bi sinn a' cur na currach air bhog. Bu toigh leis a' PhTA cuideachd àite a leasachadh faisg air abhainn bhig ri taobh na sgoile, gu bhith na chlasrum a-muigh.

A' coimhead às ar dèidh fhèin

Tha an aimsir ann an Eilean Leòdhais gu math bagarrach aig amannan, agus gu math tric tha a' ghaoth glè àrd no tha e fliuch. Tha dà àite shòisealta againn a chleachdas na sgoilearan nuair a tha droch thìde ann.

"Sa mhadainn nuair a tha e reòthte, faodaidh tu dhol dhan àite shòisealta agus tha e blàth".
(Sgoilear P1)

Seach gu bheil nas lugha de chloinn san àrd-sgoil na tha sa bhun-sgoil, tha an t-àite acasan nas lugha. Tha grunnan gheamannan a ghabhas a chluiche a-staigh aig cloinn sa bhun-sgoil, agus bidh iad gan cleachdadh gu riaghailteach nuair nach fhaigh iad air a bhith a' cluich a muigh. Chaidh na geamannan a cheannach às dèidh comhairle a ghabhail on chloinn fhèin.

"Tha an talla spòrs math, gu h-àraidh am frèam-dìridh agus ma bhios an t-uisge ann 's urrainn dhuinn geamannan a chluich".
(Sgoilear P1)

Tha bòrd-teanas aig sgoilearan na h-àrd-sgoile agus 's ann riuthasan a tha e an urra a bhith a' cumail ròta airson a chleachdadh, agus cuideachd airson a bhith a' cur rian air farpaisean eadar-thaigheil.

Tha e air leth cudromach do Sgoil nan Loch a bhith a' cur air adhart dòighean-beatha fhallain. Tha an companas a th' againn le Proiseact nan Sgoiltean Coimhearsnachd Ùra a' leigeil dhuinn measan a bhith againn dhar sgoilearan aig cuid dhe na h-amannan pleidhe, agus cuideachd botail bhùirn a ghabhas an lìonadh bho fhionnarachan-bùirn. Tha sinn an ìmpis sgeama a thòiseachadh do sgoilearan aig àm biadh meadhan-latha far am faigh iad duais ma thaghas iad biadh fallain. Bheir an duais dhaibh cothrom tagradh a dhèanamh airson 'bathar'.

"Tha biadh sònraichte math sa chafé againn".
(Sgoilear P2)

Lèirmheas agus Co-dhùnaidhean

Aig tè dhen a' ciad choinneamhan a bh' againn bha sinn air beachdachadh air dè bu chòir a bhith anns a' chiad Phlana-Leasachaidh Sgoile a bhiodh againn. Cha robh sinn air smaoineachadh an toiseach gum biodh e deatamach spiorad na sgoile a chomharrachadh air leth, a' dèanamh dheth gun tàrmaicheadh e co-dhiù ann a leithid seo de choimhearsnachd. Dh'fhairich aon dhen luchd-obrach ged-tà gum biodh e èiseil spiorad na sgoile a chomharrachadh mar àrd amas. Nuair a bhruidhinn sinn air an seo mar bhuidheann dh'aontaich sinn gu lèir gum bu chòir dhuinn a chomharrachadh mar àrd-amas. Bha an targaid airson spiorad na sgoile a thogail mar a leanas:

àrainneachd fhàilteachail, chàilear a chruthachadh anns am fairich sgoilearan agus luchd-obrach gu bheil luach air a chur orra; gu fairich iad sàbhailte agus gu ruig iad mullach an comais.

B' iad slatan-tomhais soirbheachaidh:

	gu faireadh sgoilearan agus luchd-obrach ceangal ri beatha na sgoile agus gum biodh iad dealasach airson adhartachadh,
	earbsa fhollaiseach airson cùram spioradail nan sgoilearan 's an luchd-obrach,
	bu chòir do thuigse shoilleir agus dùil chinnteach a bhith ann a thaobh giùlan, beachdan agus oidhirp, agus
	gun obraicheadh luchd-obrach agus sgoilearan còmhladh ann an co-chòrdadh air taobh a-staigh agus taobh a-muigh a' chlas.

Tha sinn a' creidsinn gu bheil sinn a-nis a' ruighinn nan slatan-tomhais sin, ach tha fios againn nach urrainn dhuinn a-chaoidh ach a bhith 'a' cumail ceann a' mhaide ri ar n-obair'.

Frithealadh agus Ruigsinn

Tha ìre-frithealaidh àrd san sgoil. Sheall sgrùdadh phàrantan a rinn sinn o chionn ghoirid gur toigh le ar sgoilearan a bhith a' tighinn dhan sgoil agus gu bheil cuid dhiubh fiù a' togail an cridhe ris. Tha sinn air prògraman ùra Cànain agus Matamataigs a thòiseachdh tron sgoil air fad agus tha am measadh a rinn sinn gu ruige seo a' sealltainn gu bheil ruigsinn ag èirigh gu h-àraidh sna h-Ìrean Tràtha. Tha sinn mothachail air, agus a' moladh a h-uile gnè adhartais.

Mar bhuidhinn-obrach tha sinn a' faireachdainn gu bheil a h-uile neach agus ar n-eòlas air fad, air cur ri spiorad agus caractar na sgoile againn. 'S e fear dhe na rudan as motha a thug cuideachadh - deagh-ghnè nan ceangal eadar buill coimhearsnachd na sgoile. Tha sin cuideachd fa-leth is còmhladh dealasach ann a bhith ag ionnsachadh. Dh'fhaodadh sgoil ùr, àlainn, air a deagh uidheamachadh innte fhèin a bhith na h-adhbhar thoileachais, ach tha fios againn nach eil crìoch air foghlam agus gu bheil gu leòr fhathast againn ri dhèanamh.